Les mots surlignés font l'objet d'une note
1Reçue à Grenoble, le 18 mars 1573.
2Monsieur, je suis despuys avanthiert en ceste ville don jespère partyr le quatriesme
3du present pour me randre incontinant auprès de Monseigneur, lequel faict faire
4ung fort pour empescher les sourtyes que font les Rochelloys sentent à la faveur de leurs
5artillerye. Monsieur ladmiral sy devoit joindre avec ces forces au premier jourt, et par ce
6moyen lon doit commancer la batterye. Le roy avoyt envoyé monsieur de Rosne en Allemaigne,
7qui revint seulement yert, lequel ma dit quil est certain quil cy faict de grandes levées
8mesmement par lellecteur duc de Saxe Auguste et par le conte de Mancesfel qui estoit avec
9feu monsieur ladmiral. Le dit Rosne asseure aussy que larmée de mer du prince d’Aurange
10est merveilleusement fourte, et que le dit prince d’Aurange ha des reytres et lanssequenetz
11prestz qui font le bruit de donner en Flandres, estant aussi en esperance davoyr des Suisses
12et que ceus que le roy devoit avoyr ce sont refroydis. Je prie à Dieu quil renverce le dessain
13de ceus qui vouldroyent aucmanter le trouble du repous de ce pouvre royaulme. Je seroys
14plus retenu à escire de telle matière, si ce nestoit que monsieur lauditeur Collombat ma
15promys de vous faire tenyr seurement la presente, dailleurs quelle vous servira d’avertissement,
16pour vous supplyer très humblement de vous tenyr sur voz guardes. Quar je say de bon lieu que
17vous estes menassé du cousté de Genève. Nous ne serions que trop voysins des Suisses si aucuns
18deus ce declaroyt contre le roy que Dieu ne veuille. Bien que vous ayés eu des lettres de messieurs
19d’Evènes et de Laval, si ne larray je de vous asseurer de leur bon pourtement, duquel je suis esté
20adverty par le moyen du cappitayne Barate qui partyt du camp le XXIe du passé. Le roy est
21à Sainct Legier. Jespère luy aller faire la reverance en macheminant vers mondit seigneur.
22Monsieur de Chastellart est davys que je ne mande rien à messieurs du pays de mon
23despart de la court, veu quilz ne sen prendront point guarde entendu que jay donné jusques
24icy de vray. Il me semble que cest le meilleur chemin que je puis tenyr. Je salue voz bonnes
25graces par mes très humbles recommandations. Priant Notre Seigneur vous donner,
26Vostre très humble très hobeyssant filz
28et serviteur à jamays
29Hourche